2010 йилда сотувга чиқарилиши кутилаётган «Volvo S60» автомобили пиёдалар хавфсизлигини таъминловчи тизимга эга бўлади. Тизимнинг асосини автомобил олд қисмига ўрнатилган радиолокацион датчиклар ва камералар ташкил этади. 
Радиолокацион датчиклар автомобил йўналишидаги объектларни ва уларнинг масофасини аниқлайди. Видеокамералар эса объектлар турини ва уларнинг автомобилга қай даражада хавф солишини назорат қилади. «Volvo» компанияси ходимларининг таъкидлашларича, камераларнинг оптикаси кўчани кесиб ўтмоқчи бўлиб турган пиёдаларни ҳам бемалол аниқлай олади. Интеллектуал тизим эса ҳар хил тўсиқ ёки йўл четида турган ахлат челакларни инсонлардан фарқлай олиш хусусиятига эга. Агар йўналишда инсон пайдо бўлса, тизим дарҳол бу ҳақида ҳайдовчини овоз чиқариб огоҳлантиради. Тизимнинг огоҳлантиришини эшитмаслик мумкин эмас. Аммо, агар шундай бўлганда ҳам ҳечқиси йўқ. Автомобил ўзини-ўзи тўлиқ тўхтата олади. Ишлаб чиқарувчиларнинг фикрича, тизим 25 километр тезликда ҳаракатланаётган автомобилнинг пиёдаларни уриб юбориш эҳтимолини бутунлай йўққа чиқаради. Юқори тезлик туфайли ҳалокат рўй берган тақдирда ҳам пиёдаларнинг жароҳат олиши эҳтимоли 20 фоизгача қисқаради.