 Сўнгги вақтларда юртимизга жаҳон футбол юлдузларининг ташрифи оддий ҳолга айланиб қолди. Эммануэль Пети билан бошланган ушбу марафон, кейинчалик Это`О, Фабрегас, Пуйоль, Иньеста, Месси, Лапорта, Ривалдо, Зико, Сколари, Мальдини номлари билан давом эттирилди. Ушбу юлдузлар ташрифида "Бунёдкор” футбол жамоасининг ҳиссаси катта бўлди, дея таъкидлаш мумкин. Сўнги ойларда эса "Ўзбекистон маданияти ва санъати форуми” жамғармаси томонидан ташкиллаштирилаётган тадбирларга футбол юлдузларининг қадам ранжида қилишлари ҳам одат тусига кириб бормоқда. Мисол тариқасида, "Style.uz-2009” санъат хафталиги доирасида Паоло Мальдини, "Янги авлод” фестивалининг тақдирлаш маросимида Самуэль Это`Оларнинг ташриф буюрганини келтиришимиз мумкин. Ушбу юдузлар марафони яна давом этади. Кейинги бекат: дунёнинг энг қиммат ўйинчиси, "Олтин тўп” соҳиби ва миллионлаб ишқибозларнинг эркатойи ("Барселона” мухлисларига ушбу жумла ёқмаганлиги аниқ) — Криштиано Роналду! Насиб қилса, Криштиано Роналдуни ўз бағрига олган самолёт 22 декабрь эрта тонгида, аниқроғи 9:00 да Тошкент халқаро аэропортига келиб қўнади. Барча гўзал футбол ихлосмандларини жаҳон юлдузини кутиб олишга чорлаб қоламиз. Олдинги юлдуз меҳмонлар сингари Роналду ҳам Ўзбекистон Футбол Федерацияси биносида меҳмон бўлиши кўзда тутилган. 10:30 да бўлиб ўтадиган ушбу учрашувда "Реал” жамоаси аъзоси федерациямиз раҳбарлари билан учрашади. Аниқроғи, аксинча - федерация раҳбарлари Роналду билан учрашади. Ҳар доим ҳам бўлавермайдиган бундай ташриф журналистлар назаридан четда қолиши мантиқсизлик бизнингча. Шу сабабли ҳам, 12:00 да "Жар” стадионининг анжуманлар залида Ўзбекистон ва жаҳон журналистлари учун (сабаби ушбу ташрифга хорижда ҳам катта қизиқиш билан қарашмоқда) матбуот анжумани бўлиб ўтади. Шундан сўнг, энг асосий қисм - мастер-класс бошланади. Соат 13:00га мўлжалланган ушбу тадбир мухлислар учун ҳақиқий футбол байрамини бахш эта олади деган умиддамиз. Бу кўплаб футбол мухлислари учун ажойиб совға бўлади. Ахир ўз хонаси деворига катта қилиб суратини илиб қўйган жаҳон юлдузини ўз кўзи билан, қўштирноқ ичида айтганда Роналдунинг тиригини кўришга муяссар бўлишади. Ушбу мастер-класс вақтида португалиялик иқтидор эгаси ўсмир футболчилар учун маҳорат дарсларини кўрсатади ҳамда стадионга йиғилган мухлислар учун ўзининг футбол санъатини намойиш этади. Кечки пайт эса у Алишер Навоий театрида бўлиб ўтадиган "MTVA-Awards-2009” тақдимот маросимининг фахрий меҳмони сифатида қатнашади. Манба: www.uff.uz
| 
