Тошкент вақти билан соат 7:30да Мадриднинг "Реал” клуби ярим ҳимоячиси Криштиану Роналду Ўзбекистон пойтахтига етиб келди. Футболчи Тошкентга чартер рейс билан Швейцариянинг Цюрих шаҳридан учиб келган. Уни Тошкент халқаро аэропортида кўп сонли футбол ишқибозлари, журналистлар ва Криштиану Роналдунинг ташрифи ташкилотчилари тантанавор кутиб олишди. Кутиб олиш маросимидан сўнг португалиялик юлдуз "Интерконтиненталь” отелига йўл олди. Меҳмонхонага киришда 24 ёшли машҳур ярим ҳимоячини минглаб ишқибозлар қарши олишди. Шу онларда Роналду сон-саноқсиз дастхатлар тарқатишга мажбур бўлди. Соат 11:00да эса Криштиану Роналду Ўзбекистон футбол федерацияси офисида меҳмон бўлди ҳамда федерация раҳбарияти, жумладан, ташкилот президенти Мираброр Усмонов билан учрашди. У, шунингдек, Ўзбек футболи музейи билан ҳам яқиндан танишди.