Машҳур рассомларнинг шундай суратлари борки, ўз даврида қадр топмай, йиллар ўтгач, миллионларга сотилади. 

Яна шундай суратлар борки, улар ўз қадри билан чизилади. Бу суратларнинг аукционлардаги сотилиш нархларини эшитиб, ёқа ушлайсиз. Қуйида ана шундай суратлар ўнталигини эътиборингизга ҳавола этамиз. Суратларни томоша қилиб, завқ олиш билан бирга ҳайратингизни ҳам яширмаслигингизга кафолат берамиз.
Австриялик рассом Густав Климтнинг 1907 йилда чизилган «Адел Блох-Бауэр портрети» номли картинаси аукционларда сотилган энг қиммат суратдир.«Олтин Адел» ёки «Австрия Мона Лизаси» деб ҳам аталувчи ушбу сурат 2006 йилда 135 миллион долларга сотилган. Уни америкалик саноатчи ва Соломон Гуггенхайм номидаги Нью-Йорк замонавий санъат музейи президенти Роналд Лаудер сотиб олган.
Бетакрор испан рассоми Пабло Пикассонинг «Трубка кўтарган бола» картинаси «Sotheby's» аукционида сотилган энг қиммат сурат ҳисобланади. 1905 йилда чизилган ушбу сурат 2004 йилда 104 миллион 100 минг долларга сотилган.
Учинчи ўринда ҳам Пикассонинг сурати қайд этилган. Унинг 1941 йилда чизилган «Дора Маар мушуги билан» номли картинаси Нью-Йоркда бўлиб ўтган «Sotheby's» аукционида 95,2 миллион долларга сотилган.
Буюк голланд рассоми Винсент ван Гогнинг «Доктор Гаше портрети» номли сурати 1990 йилнинг майида Christie's аукционида 82,5 миллион долларга сотилган. Картинада ван Гогнинг ўзи акс этган бўлиб, рассом ўз жонига қасд қилмасидан бир неча ҳафта аввал, яъни 1890 йилда чизилган. Сурат япон саноатчиси Риоеи Саито томонидан сотиб олинган.
Худди шу аукционда Риоеи Саито яна бир картина сотиб олганди. Бу буюк француз рассоми Пьер Огюст Ренуарнинг «Bal Au Moulin de la Galette» номли картинаси эди. 1876 йилда чизилган ушбу сурат учун Саито 78 миллион доллардан воз кечган.
Қадимий суратлардан бири ҳисобланмиш Питер Паул Рубенснинг «Чақалоқларни савалаш» («The Massacre Of The Innocents») номли сурати ҳам энг қиммат картиналар қаторидан жой олган. 1611 йилда чизилган ушбу сурат 2002 йилда 76,7 миллион долларга сотилган. Уни америкалик миллиардер Кеннет Томсон сотиб олган.
Қиммат суратлар рўйхатида Винсент ван Гогнинг «Соқолсиз автопортрет» сурати ҳам бор. 1889 йилда чизилган ва ван Гогнинг автопортрети ҳисобланган бу картина 1998 йили 71,5 миллион долларга сотилган. Сотиб олган шахс исми ошкор этилмаган.
Пол Сезанн томонидан 1893-1894 йилларда чизилган «Кўза ва мевалар» («Rideau, Cruchon et Compotier») номли картина 60,5 миллион долларга сотилган. Уни Американинг энг бой оилаларидан ҳисобланмиш Whitney оиласи сотиб олган.
Пикассо қаламига мансуб Нью-Йоркдаги «Christie's» аукционида сотилган яна бир сурат «Қўлларини чалиштириб ўтирган аёл» деб номланади. 1901 йилда чизилган ушбу картина 55 миллион долларга сотилган.