Португалиялик Пепе исмли жодугар 2008 йилнинг энг яхши футболчиси Криштиану Роналду тез орада фаолиятини якунлашини билдирди. Бундан олдинроқ у “Реал” ярим ҳимоячисини жароҳатлашга ваъда берганди.

Португалиянинг Correio Da Manha газетасига берган интервьюсида у тўрт ойдан сўнг Роналду қайтиб футбол майдонига чиқа олмаслигини башорат қилди. Пепенинг айтишича, тез орада жароҳатидан фориғ бўлган Роналду яна майдонга қайтади ва оғир жароҳат олиб фаолиятини якунлайди. “Тўрт ой ичида у Португалияга қайтади ва қайтиб футбол ўйнамайди”, деган жодугар.
Роналдунинг жароҳатланишига ким буюртма бергани ҳақидаги саволга Пепе “ёши ўттизларда бўлган зодагон аёл” деб жавоб берди. Жодугарнинг айтишича, Роналду бу аёлдан ўз мақсадлари йўлида фойдалангач, уни ташлаб кетган. 
Эслатиб ўтамиз, 30 сентябр куни “Марсел”га қарши чемпионлар лигаси гуруҳ босқичи ўйинида Роналду жароҳат олиб майдонни тарк этганди. Кейин эса Португалия терма жамоаси таркибида ЖЧ-2010 саралаш баҳси ўйинида ҳам жароҳатланди. Шифокорларнинг айтишларича, у жароҳатидан фориғ бўлиши учун бир ойга яқин вақт кетади.